PROSODI

PROSODI

1.     Definisyen prosodi

a.    Biuh (unsur) fonologi ti besai agi ari munyi jaku. [Trask R. L.]

b.    Crystal, D. Ngena leka jaku suprasegmental dikena nerangka biuh prosodi. Suprasegmental dikena dalam bidang fonetik enggau fonologi madahka empas munyi ti kena ba lebih ari siti segmen munyi lebuh nyebut leka jaku.

2.     Prosodi enggau Suprasegmental

a.    Prosodi nya bidang ti mansik munyi ti ngiring munyi segmental dalam sebut leka jaku.

b.    Biuh nya baka tingkat munyi (kelangsingan), pemerat (tekanan), senai (jeda) engggau ti bukai.

c.    Suprasegmental bebida enggau segmental.

3.     Suprasegmental enggau segmental

a.    Segmental iya nya mansutka unit linguistik ari sebut leka jaku ti berurun.

b.    Fonem nya unit munyi ti pemadu mit lalu morfem nya unit jalai jaku ti pemadu mit.

4.     Prosodi enggau Intonasyen

a.    Kinsit tingkat munyi nyawa ditanda ngena 1, 2, 3, enggau 4.

No. 1 – tingkat munyi nyawa ti pemadu baruh

No. 2 – tebal agi tingkat munyi nyawa dikena ngepunka sebut jaku

No. 3 – pemerat

No. 4 – tingkat munyi nyawa ti pemadu tinggi

5.     Dimensyen dalam prosodi

a.    Dimensyen artikulasyen – sebut ari perspektif orang ti nyebut

b.    Dimensyen auditori – perspektif orang ti ninga

c.    Dimensyen akustik – sebut ari perspektif transmisyen signal akustik ari orang ke nyebut ngagai orang ke ninga.

                      i.        Artikulasyen – getar peti sura, asil fizikal, kinsit artikulator

                     ii.        Akustik – unit dikena nyukat iya nya Fo, amplitud (intensiti), taga (tempo)

                    iii.        Auditori – tingkat munyi nyawa, pengelandik munyi nyawa, timpuh

d.    Dalam teori ti dikumbai teori autosegmental, iya ngena L enggau H iya nya (Low) ungkup empas sura nyawa ti baruh lalu H (High) ungkup empas sura nyawa ti tinggi. (Crystal)

Chunto:

“Sulu aku pansut dulu,” ti tau disebut ngena dua chara ti mai reti ke enda sebaka.

a.    Sulu aku / pansut dulu. (kangau ‘sulu’ ari orang ti ngumbai diri ‘aku’  lalu minta lalu minta orang ti dikangauka iya ‘sulu’ nya pansut dulu hari iya)

b.    Sulu / aku pansut dulu. (kangau ‘sulu’ ditujuka ngagai orang lalu orang ke ngumbai diri iya ‘aku’ nya madahka pengingin iya deka pansut dulu.

Aspek Peneguh Wachana

a)    Pejuraika aspek-aspek peneguh wachana.

            Wachana ke manah ngembuan peneguh wachana. Wachana nye mega mesti diasilka ngena susun ti berurun sereta bekaul dalam siti-siti wachana. Peneguh wachana beguna dikena nentuka sekalika gempung jaku nya tau dikumbai wachana. Aspek peneguh wachana bisi empat iti iya nya kaul aspek semantik, kaul aspek fonologi, kaul aspek jalai jaku enggau kaul aspek leksikal.

            Kaul aspek semantik ulih dibagi ngagai dua iya nya kaul semantik entara siti-siti sitak wachana enggau dipeda ari konteks tauka latar wachana. Kaul semantik entara siti-siti sitak wachana ngundan tiga iti leman pekara iya nya kaul kebuah enggau empas, kaul kebuah enggau tuju sereta kaul kebuah enggau asil. Enti dipeda ari konteks tauka latar wachana, kitai deka beratika tiga iti leman pekara mega iya nya konteks tauka latar wachana, kaul sosial entara penyebut enggau peninga sereta gaya lebas jaku ti dikena.

            Chunto wachana ke ngembuan kaul kebuah enggau empas nya baka tu, Abut suah enda datai sekula (kebuah) ngujungka iya pil ba peresa (empas). Kaul kebuah enggau tuju, chunto iya baka tu: Imas meli mangkuk (kebuah). Mangkuk nya ka dikena iya engkah sup (tuju). Nangkan ke nya iya nya kaul kebuah enggau asil. Chunto iya, Bugat bagas amat gawa(kebuah). Iya bulih mayuh duit (asil). Chunto bagi kaul semantik ari sukut konteks tauka latar wachana nya baka tu, Mua Fazlynn nyau tampak. Gaga amat gamal iya. Iya nyau jauh berubah manah ari suba. Ayat nya mandangka iya suba selalu dipeda tusah ati tang diatu iya dipeda lantang belama.

            Udah nya, kaul sosial entara penyebut enggau peninga. Chunto iya baka tu: Emily: bisi? Sheera: nadai, udah abis. Ba ditu semina seduai iya ke berandau aja mereti utai ke dikerandauka, tajapan orang bukai enda mereti. Kebuah pia laban seduai ke berandau bisi kaul sosial enggau pangan diri. Lebas jaku ti dikena mesti seriran enggau konteks ayat ti ka digaga. Baka ba iklan, lebas jaku iya pandak sereta mudah. Kebuah pia ngambika iklan nya nyamai diperetika orang. Chunto iya, TYT, manahka pengerai!

            Kaul aspek fonologi nya bepelasarka senai, intonasyen enggau entak sebut (kelebih agi maya bejaku). Kebuah pia laban ari intonasyen, senai enggau entak sebut orang ke bejaku nya tadi kitai ulih nemu sekalika ayat tauka munyi jaku ke dipansutka iya nya ayat penerang tauka ayat tanya. Enti ditulis, bansa ayat ulih diperetika kitai lebuh kitai beratika tanda bacha ke dikena. Chunto iya, Udah datai (ayat penerang). Udah datai? (ayat tanya). Enti bejaku, ayat penerang disadaka ngena intonasyen ke baruh tang terang didinga. Ayat tanya dibantaika ngena intonasyen ke tinggi agi.

            Kaul aspek jalai jaku nya nyengkaum penunjuk referen, penunjuk penganti, penunjuk kaul enggau elipsis. Penunjuk referen iya nya ngena jaku ganti nama orang enggau penunjuk dikena ngaga kaul. Chunto iya, i. Sudau mandi. Iya mandi ba pendai. (JGNO). ii. Kami ngabang ngagai rumah Lydia. Kami bemalam din sepengelama dua hari tiga malam. Penunjuk penganti mai reti nganti siti-siti leka jaku enggau leka jaku ke bukai. Chunto iya, Ludan suah nginjau rengka orang. Ulah iya nya enda dikerinduka sida serumah. Penunjuk kaul iya nya bekaulka leka jaku enggau leka jaku, rambai jaku enggau rambai jaku sereta ayat enggau ayat. Chunto penunjuk kaul iya ke suah dikena neguhka wachana iya nya enggau, tang, nya alai enggau udah nya. Ellipsis iya nya ningkilka leka jaku tauka rambai jaku ke dikena sebedau nya.

            Ditangkanka enggau peneguh kaul aspek leksikal iya nya kait entara leka jaku tauka pengaya leka jaku ba siti-siti wachana. Udah nya kaul bepelasarka aspek baka sinonim, antonim, hiponim, ngulang leka jaku ke sama, kolokasyen enggau leman besaut. Sinonim iya nya leka jaku ke sama reti. Chunto iya: bajik sama reti enggau manah. Antonim iya nya leka jaku ke belaban reti. Chunto antonim iya nya  gemu belaban reti enggau leka jaku kurus. Hiponim iya nya siti leka jaku ke mungkur reti leka jaku ke bukai. Chunto iya bungai. Leka jaku bungai nunjukka ngagai mayuh macham bansa bungai.

            Ngulang leka jaku ke sama. Chunto iya: Imas ketawa. Iya ketawa inggar amat. Kolokasyen iya nya leka jaku ti ngembuan reti ke enda sama tang bekaul. Chunto iya: mansai, ngerandu enggau ngerau lalu enti bisi sungai mesti bekaul enggau ikan. Udah nya, leman besaut. Chunto iya Apai Jarau muai buah ti udah ditiki iya ke baruh. Indai Jarau lalu nyambut buah nya enggau raga. 

Pengantar Sosiolinguistik - Jaku Kangau

PENGANTAR SOSIOLINGUISTIK

JAKU KANGAU

1.    Jaku kangau ulih dibagi ngagai dua iya nya :

a.    Jaku kangau ngagai diri empu

b.    Jaku kangau ngagai orang bukai

2.    Jaku kangau ti baka tu ti dikena kitai ngangauka orang nya enggau jaku ti alus ngambika orang nya enda nyima sereta ngenyamaika ati orang ti ninga.

3.    Chunto iya tau dipeda baka di baruh tu:

Diri empu, diri sebilik enggau kaban belayan (enda formal)

Semantik

Semantik

            Tiap leka jaku ti dikena endang ngundan reti kediri empu. Semantik iya nya sebengkah leka jaku ti baru dipansik dalam bidang penemu linguistik. Ia keterubah dikelala ba tahun 1894 dalam siti kertas kereja ti diberi nama Reflected Meanings: a point of semantics ti dibantaika Persatuan Filologi Amerika. Taja pia, setahun sebedau nya, M. Breal udah nulis senentang nya dalam jaku Peranchis. M. Breal madahka semantik bisi penuduk kediri empu ba luar jaku. Iya bekaul enggau leka jaku ti berubah reti nitihka latar belakang reti, reti enggau logik sereta kaul reti enggau psikologi.

            Reti rama semantik iya nya siti bidang penemu linguistik ti mansik reti leka jaku ba tikas jaku, frasa, klausa tauka ayat. Ari sukut leka jaku, Palmer madahka semantik datai ari jaku Yunani iya nya ‘sema’ (semaine) – mansik pasal reti (makna).

Definisyen Reti

            Ketegal semantik ti bekaul enggau reti, definisyen reti dalam linguistik mega patut dipeda sereta diperetika dalam penemu semantik. Harimurti Kridalaksana (1983: 149) nerangka “semantik sebagai bahagian daripada struktur bahasa yang berkaitan dengan makna”. Reti nya semantik endang bekaul rapat enggau reti (makna). Semantik mega disebut nyadika siti sistem enggau pansik reti dalam sesebengkah jaku.

            Katz (1972: 1) madahka “semantik ialah kajian tentang makna linguistik. Ia membicarakan tentang apakah yang ditonjolkan dalam ayat atau lain-lain objek linguistik”. Nitihka penemu Pei & Gaynor: “semantik sebagai suatu sains yang menghuraikan kaitan referents (benda) dengan referends (rujukan)”.

          

Kaul Leka Jaku ari Sukut Reti

            Nitihka penemu Abdullah Hassan (1980: 241), leka jaku endang ngembuan reti. Bakani reti leka jaku nya bekaul, nya bepanggai ngagai chara orang ke ngena jaku nya nusun semua peneleba iya dalam jaku iya ti diasilka ari leka jaku.ari luar penemu tu, kitai semina beratika kaul reti nya ari sukut sinonim, antonim, polisem enggau hiponim.

            Nangkan ke nya iya nya sinonim. Sinonim iya nya leka jaku ti ngembuan reti ke sama. Nitihka Kamus Dewan, reti sinonim iya nya leka jaku ke sama reti tauka nyau ka sama reti enggau leka jaku bukai. Leka jaku ke ngembuan reti ke sama nya nyengkaum leka jaku ke sama ari jaku asal tauka kedua-dua leka jaku nya jaku injau. Chunto iya, leka jaku majuh sama reti enggau leka jaku makai. Nambah ke nya, leka jaku uduk sama reti enggau leka jaku ukui lalu leka jaku mati sama reti enggau leka jaku parai. Leka jaku inggar mega ngembuan reti ti sama enggau leka jaku ragak. Leka jaku ti  ngembuan reti ke sama nya tadi endang enda sebaka dikena nitihka pelilih menua tang reti iya agi sama lalu tuju iya dikena ngenataika pekara ke sama. Kebuah pia laban sinonim tau nyadi ari dialek ke enda sama. Sinonim mega nunjukka pengasai ti enda sama taja pen reti iya sebaka. Chunto leka jaku majuh enggau makai nya tadi. Kasar bendar munyi didinga enti kitai ngena leka jaku majuh lebuh ka mai sida makai. Bisi sekeda orang deka nyima ati laban ba sida iya leka jaku nya kasar sereta enda nyamai didinga pending. Munyi ke ringat tauka deka nganu.

            Kelimpah ari nya, leka jaku ulih dikaulka enggau reti iya bepelasarka antonim. Antonim tu iya nya leka jaku ti belaban reti. Leka jaku belaban reti tu ulih dibagi ngagai tiga bengkah iya nya leka jaku belaban reti jaku pengawa, leka jaku belaban reti jaku nama enggau leka jaku belaban reti jaku penteba. Chunto leka jaku belaban reti jaku pengawa iya nya leka jaku ketawa belaban enggau leka jaku nyabak. Chunto leka jaku ti belaban reti ba jaku nama iya nya malam belaban enggau leka jaku siang. Kurus enggau gemu iya nya leka jaku ti belaban reti ba jaku penteba (sifat).

            Polisem reti nya siti leka jaku tang ngembuan mayuh reti ke enda sama. Chunto iya leka jaku ‘telu’. Kita sama nemu reti telu tu nyengkaum semua telu ti diasilka jelu baka manuk, burung, tichak tauka baya. Taja pia ba kitai mensia, mayuh orang nyebut lebuh siku-siku orang nya nadai bulih mark iya dikumbai bulih telu. Chunto ba ayat, ‘Jiram bulih telu ba keretas peresa Matematik laban iya sigi enda ngaga saut tanya ba keretas peresa nya’. Reti nya Jiram nadai bulih mark. Chunto ti kedua baka tu, ‘Igat bulih telu saritu laban iya enda nurun ke sekula’. Reti nya ba keretas rikod penatai nembiak ke sekula, enggi Igat ditulis orang kusung (0) nandaka iya nadai datai ke sekula. Nya ti dikumbai bulih telu. Chara kitai deka ngelala leka jaku polisem iya nya kita beratika reti pugu leka jaku nya. Chunto iya enti kitai beratika leka jaku bungai. Leka jaku bungai reti nya sebengkah utai tumbuh. Bungai mega dikena nyemaka bala indu dara sereta bisi mega orang ngena leka jaku bungai ba pengawa berutang baka, ‘utang nyengkaum bungai’.

            Nitihka Abdullah Hassan (1980: 248), leka jaku hiponim iya nya leka jaku ti ngembuan sengkaum enggau peringkat tauka tikas iya dalam struktur reti. Reti nya siti leka jaku ti mungkur reti leka jaku ke bukai. Chunto iya leka jaku bungai. Bungai tu nyengkaum mayuh macham bansa bungai baka bungai ros, bungai kenunsung enggau bungai rajang. Baka nya mega leka jaku umai. Iya nyengkaum umai paya enggau umai bukit.

Gentilang Reti

            Bisi dua tiga iku orang ti udah bejalaika pansik bekaul enggau gentilang reti tu. nitihka penemu Lehrer (1974: 10), pansik senetang gentilang reti tu udah dipejalaika Berlin enggau Kay dalam kandang taun 1970 senentang reti chura enggau gentilang reti chura. Dalam pansik iya nya, mayuh orang enda setuju sereta ngembuan penemu ke bebida senentang chura mirah enggau oren. Nya alai amat beguna ba kitai beratika gentilang reti nyadika siti situasyen tauka kereban ti ulih ngaitka beberapa iti leka jaku dalam raban iya empu dikena meri reti ngagai leka jaku ti dikedekaka kitai. Dalam bejuraika senentang gentilang reti tu, Abdullah Hassan (1980: 228-229) madahka dalam pengawa nguji meri reti ngagai sesebengkah utai, kitai ngena leka jaku lain. 

(semina bekunsi, ukai reti iya semua betul magang lalu tau ditisih sereta diseruri baru :) )

Konsep, Penteba enggau Fungsyen Litaricha Iban

Konsep, Penteba enggau Fungsyen Litaricha Iban

            Leka jaku litaricha datai ari jaku English ti dikumbai literature tang reti literature tu besai amat bungkur iya laban nyengkaum semua bansa karang ti diasilkan mensia ba dunya tu iya nya a body of written works related by subject-matter (Chris Baldick, 1981 : 124). Reti nya, semua bansa karang ulih dikumbai litaricha. Kamus Inggeris-Melayu Dewan (2002: 885) pan meri definisyen ti lebih kurang sama iya nya, writings of a particular subject lalu bisi meri definisyen ti kedua iya nya, creative writings. Creative writings reti nya sebarang karang kreatif pasal sesebengkah pekara sekalika karang dalam novel, cherpan, drama, leka main enggau karang ti bukai.

            Enti kitai beratika leka jaku literature dalam jaku Melayu, leka jaku nya dikalihka sida ngagai leka jaku kesusasteraan. Leka jaku kesusasteraan nya jaku tumbuh ari leka jaku sastera ti datai ari jaku Sanskrit ti disebut castra, reti nya bup. Nya alai reti sastera nya bup ti dikarang orang. Reti nya semua kereban ti diasilka ari karang sastera – nya ti dikumbai kesusasteraan (Hashim Awang, 1985). Ketegal kitai Iban ti nadai jaku kesusasteraan, kitai Iban nginjau jaku English ti dikumbai literature. Nitihka penemu Chemaline Osup, 2011 – litaricha Iban iya nya semua asil seni ti dikenataika tauka ditulis ngena jaku Iban lalu ukai ngena jaku bukai. Litaricha Iban nyereminka pengidup, pikir enggau runding, waris daya idup enggau timpai dunya orang Iban. Litaricha mega ulih nyadika siti dokumen pasal daya idup Iban laban iya ngayanka pemaik, penemu enggau pengelikun genturung pendiau orang Iban di menua tu. Kebuah pia laban ari gempung karang litaricha, raban bansa bukai ulih tepedaka ulah, pendiau, runding, daya idup, penyerakup, sosio-ekonomi, pemansang sekula enggau stail pengidup kitai Iban di rumah panjai. Teori Milton Albrecht ti ngumbai litaricha nya cheremin daya idup mensia laban litaricha mancharka pengidup mensia ari asil karang iya, endang betul.

            Sebedau litaricha betulis (bechelak) tu ada menya, endang iya udah bisi litaricha tang maya nya semina litaricha lisan aja. Litaricha lisan nya mih ti ditengkebang lalu ditusui orang siku ngagai orang bukai lalu orang ti nusui cherita ngagai orang bukai di menua bukai tauka ba sebarang alai ba sebarang maya. Nya alai litaricha lisan nadai nama pengarang laban semua orang ulih nusui cherita nya lalu nampung iya. Litaricha lisan nadai orang ti meruan ngempu iya laban semua orang sama bela nguna iya lalu nyadung iya ke bukai.

            Sejarah udah ngayanka bansa kitai ngembuan mayuh kereban litaricha lisan ti udah disimpan dalam tukuh chelak lalu pia mega litaricha moden nyengkaum pelandai enggau dindang. Kereban litaricha lisan tauka litaricha rayat menya dichelak lalu disimpan Borneo Literature Bureau (BLB) tang sepengudah BLB nya midang, dia The Tun Jugah Foundation udah mekuh pengawa ngumpul, nyimpan enggau ngarang kereban litaricha Iban.

            Litaricha kitai Iban menya endang ngemeratka pengelantang enggau pengelikun raban bansa, nadai ngemediska ati orang, nadai mega bejaika sapa-sapa. Litaricha menya sigi bekonsepka pemerindang iya nya dikena ngelantangka ati tang ukai dikena ngemuaska diri aja. Enti iya litaricha lisan, cherita dalam nya besangkut amat enggau rampa menua sereta genturung pendiau raban bansa kitai empu. Watak ti kering sereta ngembuan pengelebih selalu diasuh menang ngelaban watak ti lemi. Tuju iya dikena ngayanka pemendar enggau realiti pengidup bansa Iban menya; iya nya sapa kering, rajin, landik sereta ngembuan mayuh pengelebih, iya tentu deka nyamai idup sereta senang lantang. Orang ti buruk sereta ngelusu deka ngasaika pengidup merinsa.

            Taja pen litaricha bekonsepka pemerindang, iya tetap ngembuan alegori tauka sema banding awakka nyadi teladan, chuan, malin, peduman, pesan, ajar enggau lalau sereta jaku tangkan ari pengarang ngagai pemacha ngambika sida belajar ari peneleba enggau pemaik dalam litaricha lalu nyadi mensia ti menyana. Nya alai fungsyen litaricha kitai Iban nya endang dikena ngedang pengidup kitai awakka bisi tuju. Taja fungsyen besai litaricha tu endang dikena beperindang, iya mega beguna bendar dikena ngajar. Nya kebuah tema pengidup begulai sejalai, pengelurus runding, pengawa ngerupan (kereja begulai) enggau beduruk, pengalus jaku, enggau adat basa endang bisi dikena dalam liatricha kitai Iban. Karya litaricha mayuh ngena jaku silup, jaku karung, jaku sema enggau sempama ngambika ajar dalam litaricha nya enda kelalu mantang sebarang pemacha tauka peninga. Nya alai litaricha ti ditulis nya tadi ukai tak semina dikena merindang ati aja tang bisi ngembuan potensi nempa, nyepuh ngambuh nembiak redak baru lalu engkeman dibacha bala nembiak enggau sida ti tuai sereta seriran enda ngira nya lelaki tauka indu.

            Enti litaricha kitai Iban nya manah, iya tau nyadika pengelala (identiti) bansa kitai Iban lalu tau ngayanka penulin (jati) diri bansa kitai. Nya alai pengarang ditangkan enggau jaku pesan awakka nulis karang ti ngayanka pemaik raban bansa kitai lalu nulis karang ti ngundan idea ti badas, pesan ti nyengala mai pemaik enggau penyerakup, budi, adat basa, timpai dunya ti menuku enggau falsafah pengidup ti menyana laban asil litaricha nya tau nyadi niat tauka juluk ati raban bansa. Dulu kelia, karang tauka asil litaricha semina bekonsepka
“Seni Ungkup Seni” reti nya karang semina dikena ngayankan nilai estetika aja tang diatu udah bekonsepka “Seni Ungkup Raban Bansa” ti mai reti asil karang dikena ngangkatka pemaik raban bansa. Chunto iya, ASAS 50 ngasilka mayuh kereban litaricha ti nyungkakka semengat patriotisme maya nya ngujungka Tanah Melayu, Sarawak enggau Sabah mujur teulihka merdeka nengah penumbuh menua Malaysia.

            Litaricha Iban bisi tiga bengkah iya nya litaricha oral, litaricha tradisyenal enggau litaricha moden. Litaricha oral iya nya litaricha ti dikenataika ngena chara sebut tauka bejaku ari siti generasyen ngagai generasyen ke bukai. Nya alai litaricha oral tu nadai benama pengarang. Chunto iya, mitos, lagenda enggau cherita rayat. Litaricha ti dikumbai tradisyenal nya mega dikumbai litaricha klasik tauka litaricha lama. Lama (old) reti nya having existed for a long time (Kamus Inggeris-Melayu Dewan, 2001: 1060) – iya nya udah tuai. Nya alai litaricha lama nya iya nya litaricha ti udah tuai tang iya betukuh sementara laban pekara ti baru tau datai lalu iya ti baru nya pan nyadi lama mega lebuh utai bukai ti baru agi udah datai. Litaricha lama suah agi dikenataika ngena chara oral lalu tau ditambah isi enggau kuah iya. Litaricha klasik iya nya litaricha ti ngena gaya tauka standard ti enda berubah. Iya bisi tukuh (nilai) kediri empu ti enda berubah (Kamarudin Haji Husin & Siti Hajar, 1999) taja pan timpuh enggau jeman enda berubah. Ba konteks litaricha, tradisyen tauka tukuh litaricha ti lama lalu enda berubah. Reti iya, iya ti dikerembaika chara lisan menya enda ulih ubah kitai diatu, litaricha ti nadai benama pengarang menya enda ulih ubah kitai diatu lalu penteba iya mega enda ulih ditukar tauka diubah kitai baru. Semua pekara nya entap ba dia, nya alai iya lalu nyadi klasik. Litaricha tradisyenal ngembuan tema, penyedang gaya, penemban enggau struktur ti tentu.

            Nengah litaricha tradisyenal, kitai tau nemu sereta ulih nisih chara orang kelia bepikir enggau daya idup sida iya. Litaricha tradisyenal mengkang diguna kemaya hari tu dikena nyadi pun penemu, cheremin timpai dunya, agi dikereja (baka leka main ti dikena dalam ritual maya gawai), agi diambika lalau pendiau, agi dikena nyadika adat (baka tusun tunggu) sereta dikena nyungkakka pengelala (identiti) bansa Iban enggau penulin diri (jati diri). Sekeda litaricha dikumbai kudus laban dikena ngangauka Petara kitai dalam ritual ti dipejalaika lebuh maya gawai baka leka main kategori invokasyen. Leka main pemerindang endang sigi meruan dikesuhka ngelama tu lebuh maya deka beperindang enggau pangan diri lalu leka main adat basa mayuh dikena lebuh nyambut tauka nempara temuai ti datai ngagai rumah panjai maya bisi pengerami tauka maya gawai. Ari nya adat basa nya tadi kitai ulih ngerapatka kaul enggau orang ti datai. Taja pen litaricha nya udah lama tang tradisyen iya agi dikena datai ke diatu laban litaricha nya sigi ditengkebang ukai semina nyadika seni meala-ala neresa jaku Iban tang mega nyadika rengka dikena dalam pengidup besehari-sehari lalu kereban litaricha tu mih ngempung bansa kitai Iban ngasuh kitai beserakup dalam pengidup.

            Konsep litaricha moden bisi besangkut amat enggau timpuh sereta penteba litaricha ti diasilka maya nya alai kitai tau ngumbai iya litaricha moden. Penteba iya mega ulih dikena ngelai bida iya ari litaricha tradisyenal. Richard Ellman enggau Charles Fiedelson dalam bup seduai iya The Modern Traditions; Backgrounds of Modern Literature madahka modenisme lebih ngemeratka pola tauka paten ti dikembuan litaricha nya. Reti nya, litaricha nya ‘bebas’ ari konvensyen tauka leman ti lama. Litaricha ti ngayanka konvensyen ti baru iya nya chara pengarang bepikir enggau runding ti baru ti dibantaika sida dalam litaricha nya (Yahya Ismail , 1976: 2 – 3). Dalam korpus litaricha tukuh prosa, penyerara entara tradisyenalisme enggau modenisme iya nya pikir runding enggau tema ti diayanka dalam karya nya, sekalika nya cherpan/ jerepan tauka novel.

            Dalam litaricha moden, karya kitai Iban udah ngembuan tukuh ti baru, iya nya bepelasarka gaya pengidup ti bendar, situasyen ti bendar, endur tauka palan ti bendar enggau konteks ti bendar lebuh ngasilka kerban litaricha baka jerepan enggau novel. Pengarang mega nguji deka nyerakupka raban bansa enggau chara bekenangka patriotisme, propaganda, pengangkun ke menua enggau bansa – reti nya bekenangka pengawa rama  ke bekaul enggau pengidup pupu raban bansa. Ba pengawa nulis novel enggau jerepan, bisi dua tiga iku pengarang modenis kitai Iban baka Janang Ensiring, Jantan Umbat, Thomas Bangit, George Garai enggau Harry Usup Umbar. Janang Ensiring orang ti keterubah iya mai tukuh runding enggau konvesyen ti baru nengah jerepan ti ditulis iya, Batu Kuai ba taun 1975. Pandak jaku, jerepan moden ada ba taun 1975.

            Penteba litaricha moden iya nya tiap-tiap karya bisi ditulis nama pengarang. Enda betukuh kolektif baka litaricha tradisyenal. Litaricha moden tau nguntungka pengarang laban asil litaricha moden besifat komersil. Kelimpah ari nya, Litaricha moden mega nadai betukuh pelilih menua (kedaerahan) baka litaricha tradisyenal. Dalam litaricha moden, jaku ti dikena iya nya jaku standard. Bisi mega jaku English tauka jaku bansa bukai dikena. Ayat ti dikena pan bemacham, enda diserekat ngagai sebansa ayat aja.

            Aspek ti sebaka ba dua bengkah litaricha tu (tradisyenal enggau moden) iya nya sama betukuh didaktik, iya nya ngenataika lalau pendiau enggau ajar dikena ngemenyanaka mensia. Tu mih ti dikumbai mesej tauka pesan dalam litaricha – novel, jerepan, enggau leka main sama bela ngundan ukur pendiau ti ulih diambi kitai ke teladan enggau ke tenggau kitai ngambika sida ti jai tau nyadi manah, ngambika ruang bilik enda pechah belah sereta ngembuan pendiau ti menuku.

            Disimpul ngena jaku pandak, konsep litaricha berubah nitihka jeman iya diadaka, bepanggai ba pemesai guna litaricha nya. Taja pan litaricha tradisyenal baka ti enda dikibuha agi, ukai reti nya iya ditejuka punas baka nya aja. Kitai meruan agi begunaka litaricha tradisyenal nyadika penyanding penemu ti pemadu beguna dikena kitai beratika penemu enggau waris daya idup Iban menya awakka bisi dibandingka kitai enggau pengidup raban bansa ke sehari tu. Taja litaricha nya dikumbai tradisyenal, iya enda tau dibuai tauka ditempaya pia aja laban iya udah nyadika korpus litaricha ti pemadu berega lalu nadai agi endur ngiga iya ke jemah ila. Pengada litaricha moden semina tak nambahka agi penyelai tukuh litaricha.

Annual Dinner Kampus Rajang 2014

selfie ^_^ Dinner at Jasmine Ballroom of RH Hotel

               

               

               

Pesta Nanas 2014

ini jer gmbr yg sempat diambik...pas tu syok brjalan... ;-)