Bansa & Lebas Jaku

1.    Bansa enggau Penteba Lebas Jaku

            Lebas jaku nerangka chara enggau gaya ngena sesebengkah jaku. Ure & Ellis (1977) madahka lebas nya ‘tukuh jaku ti dikena nitihka siti-siti situasyen ti enda sama’. Kelimpah ari nya, Halliday (1968) nerangka lebas jaku nya Variasyen jaku ti bebida bepelasarka fungsyen iya. Iya madahka lebas jaku berubah-ubah nitihka situasyen.

Tukuh Lebas Jaku

a)    Lebas jaku ti enda sama ditisih ngagai dua bengkah pekara iya nya:

        i.        Tukuh bekabih enggau sesebengkah pengawa jaku (peristiwa bahasa)

           Tukuh tu ulih ditisih ngagai dua bengkah iya nya situasyen luar enggau situasyen ti ngelingi. Situasyen luar nya latar sosial daya idup sesebengkah orang ti bejaku ngena jaku nya. Situasyen ti ngelingi nya pekara ti bekabih enggau jaku. Bisi empat pekara ti bekabih enggau situasyen ngelingi iya nya chara ngenataika jaku sekalika nya berandau, betulis tauka jaku isyarat, kaul sosial  entara orang ti ngena jaku nya, pekara ti dikerandauka enggau tuju sosial pengawa jaku nya sekalika nya rasmi tauka enda rasmi.

       ii.        Tukuh Linguistik

            Tukuh linguistik mai reti teba sistem jaku baka munyi, leka jaku lalu mega rambai jaku enggau ayat. Munyi tu iya nya sada nyawa (drama, bejaku, etb). Ari sukut leka jaku iya nya leka jaku ti nemban bepelasarka bidang, kolokasyen (dua leka jaku ti bekaling sebut, leka jaku injau). Ayat nya ari segi tengkebang, tusun enggau pemanjai iya.

Format lebas jaku

Lebas jaku ngembuan format kediri empu baka ti di baruh tu:

i.              Lebas jaku adat tauka ukum (akta)

ii.             Lebas jaku bejaku

iii.            Lebas jaku iklan (tender)

iv.           Lebas jaku ripot berita dalam surat khabar.

Bansa enggau Tukuh Lebas Jaku

1.    Lebas Jaku Selama

            Lebas jaku selama nadai ngembuan konteks ke spesifik tauka sebarang bidang penemu. Lebas jaku selama tu endang dikena dalam randau besehari-hari. Nadai leka jaku ke spesifik. Struktur ayat iya mudah, pandak sereta nyamai diperetika. Jaku injau nadai mayuh dikena sereta nadai leka jaku teknikal. Tukuh lebas jaku selama formal dikena lebuh sitaussyen formal aja. Tukuh lebas jaku selama enda formal ngena tukuh jaku sempepai alai.

2. Lebas jaku Media Massa

Tanggung pengawa media massa iya nya mantaika penemu enggau berita ngena leka jaku ti pemadu muntang sereta mudah diterima ulih bala peninga tauka pemacha. Lebas jaku media massa kurang ngemeratka gaya tauka nahu, kelebih agi maya ngena penambah tauka jaku penyambung. Jaku ti dikena mega semina jaku selama lalu betukuh ngenataika siti siti perkara ti nyadi. Pia mega , jaku dikena mega pandak lalu bisi ngundan berita ti mayuh lalu deka dipandangka ngagai bala mayuh. Lalu, ayat ti panjai lalu bisi ngundan pengaya leka jaku, ngena teks, metafora, jaku silup istilah teknik enggau ti bukai patut dilakka. Guna lebas jaku media massa tu iya nya dikena ngenatai informasyen tauka ripot lalu ngena jaku ti paling mudah diterima bala peninga enggau pemacha. Lebas jaku tu mega enda ngemeratka jalai jaku. ukai nya aja, nadai istilah teknikal tauka spesifik.

Penteba enggu tukuh lebas jaku media massa.
1. Jaku ti dikena muntang.
2. Gaya maya nulis mudah diperatika.
3. Ngena istilah ti nemban.
4. Nya alai, media massa digaga dikena bala mayuh, lalu jaku kereban chelak patut engkeman enggau jaku tu ulih ditemu bala mayuh.

3.    Lebas Jaku Iklan/ Dagang

            Lebas jaku iklan iya nya jaku ti dikena ngelakuka barang-barang ke deka dijual ngagai pemeli. Iklan barang-barang dagang beguna bendar laban kemaya hari diatu, mayuh macham barang ke bisi dijual orang ba pasar lalu ngujungka bala pedagang tu deka besemekih enggau pangan diri ngelakuka barang dagang sida empu.

            Iklan tu nguna lebas jaku ti betul sereta engkeman ngambika barang ke deka dijual nya laku sereta ulih narit ati bala mayuh. Nyadi, iklan tu dikena ngelakuka barang dagang lalu bala pedagang deka bulih untung ti besai enti nyema sida pandai sereta landik narit ati bala mayuh meli barang ke dijal sida. Bala pedagang mega deka ngasuh bala mayuh semampai rindu ke barang ke dijual sida ngambika semampai dibeli bala mayuh. Barang ke bisi jenama mega deka semampai tinggi rega laban iya endang semampai dibeli mensia mayuh.

             Jaku dalam iklan endang bisi tuju iya kediri empu lalu tuju iya ngagai bala pemeli ke disadang. Lebuh ngena jaku dalam iklan, orang ke bedagang deka mansik penemu tiap iku pemeli ngambika sida ngubah sikap sida lalu ulih narit ati sida lebuh ngaga pemutus senetang barang ke patut dibeli. Lebas jaku iklan bisi ngembuan leka jaku ke manah sereta leka jaku ke ulih narit ati orang. Lalu leka jaku nya betukuh ngumbuk, ngasuh, ngumpan, meri banding dikena ngelakuka barang dagang sida. Ari nya, bala mayuh deka tetarit ati meli barang ke dijual sida lalu ulih meri untung ngagai sida ke bedagang nya enti nyema sida pandai ngena lebas jaku iklan ke betul sereta engkeman.

            Enti iklan ke betuju nyual sesebengkah barang, bala pedagang mega bisi unsur muji enggau ngumbuk amat dikemeranka. Jaku ti dikena dalam iklan ke bansa tu bisi tukuh nyelai mimit. Entara chara enggau lebas jaku ti bisi dikena dalam iklan iya nya:

      I.        Chara ngumbuk

Chara tu bisi ngembuan leka jaku ke ulih ngumbuk bala mayuh ngambika tetarit ati meli barang ke dijual bala pedagang nya. ambika ke chunto leka jaku ke suah dikena sida baka ‘ digaga semina ke nuan’, ‘ semina ke pengerai nuan’ enggau ti bukai. Lebas jaku ke baka tu balat amat narit ati bala mayuh laban sida endang arap ke jaku munyi nya.

    II.        Chara ngumpan

Chara ngumpan tu ngena jaku ke ulih narit ati bala mayuh ngambika jampat meli barang ke dijual bala orang dagang. Ambika chunto, lebas jaku ke suah dikena sida ngumpan bala mayuh baka ‘beli meh barang tu, bisi diskaun 70%’ enggau ti bukai. Bala mayuh al uterus tetarit ati meda leka jaku barang nya bisi diskaun.

   III.        Chara manding

Chara manding tu dikena nunjukka pengelebih ke bisi ba siti-siti barang enti disbanding enggau barang bukai. Ambika chunto lebas jaku chara manding tu baka, ‘barang A manah agi ari barang jenama B’ enggau ti bukai. Ari nya, sida udah meri banding ngagai bala mayuh ni bagi barang ke manah agi dibeli orang mayuh.

  IV.        Chara ngasuh

Lebas jaku bansa tu dikena ngasuh enggau ngansak bala mayuh ngambika meli tauka nguji sesebengkah barang. Ambika chunto, ‘beli meh jenama A diatu, nuan sigi puas ati. Ari nya, sida udah ngasuh sereta ngansak bala mayuh ngambika meli barang ke dijual sida.

4.    Lebas Jaku Sains

            Lebas jaku sains tu betukuh ilmiah enggau formal sereta iya ngemeranka fakta ti betul. Lebas jaku tu ngembuan istilah kediri empu lalu iya mesti betul. Lebas jaku tu mega dikenataika enggau chara formal. Informasyen ti diulih ba dalam lebas jaku tu bepelasarka asil pansik enggau fakta.

            Kelimpah ari nya, lebas jaku tu bisi ngena leka jaku enggau formula tauka simpul ti bekait enggau bidang sains. Kitai sama nemu bidang sains tu endang ngembuan mayuh macham formula dikena mantaika informasyen tauka fakta ngagai bala mayuh. Lebas jaku tu mega bis ngena leka jaku ti nemban nyadi pekara ti pemadu beguna dalam wachana bansa tu.

            Tukuh lebas jaku sains tu betukuh intelektual, sainstifik, formal enggau bisi objektif kediri emu. Iya mega mayuh ngena tukuh sains enggau teknikal. Lebas jaku tu bisi ngena leka jaku injau kelebih agi ari jaku English. Iya mega mayuh ngena jaku nama enggau ragam ayat pasif.

Istilah Khusus

            Dalam lebas jaku tu, lebas jaku ke dikena mayuh agi ngagai jaku nama primer iya nya jaku nama ti pemadu tinggi dalam sains. Kebuah pia laban, bidang sains tu endang mayuh pengawa mansik utai ke idup enggau utai enda idup ti ngelingi pengidup kitai mensia. Ambika chunto, lebas jaku ke dikena dalam lebas jaku tu baka, ‘mol ion hydrogen, ‘penitratan’, ‘diekstrak’ enggau ke bukai.

Penerang

            Dalam lebas jaku sains tu, iya ngemeranka penerang sesebengkah fakta laban dalam bidang sains tu fakta nya asil ari pansik ke nyemetak ari mayuh macham sumber ke digumpul lalu digaga analisis. Nyadi istilah ke dikena dalam lebas jaku sains tu mesti terang ngambika ulih diperatika orang bukai. Ambika chunto, leka jaku baka, ‘nilai pH’, ‘molekul ion’ enggau ti bukai.

            Pemansang dunya teknologi berubat cisi pemaju ba kereban ti dikena ngubat mensia. Kereban ti dikena berubat baka computer ulih mantu ngurangka risiko penanggul maya kitai berubat laban ari nya, rengka ti dikena kitai berubat nya jampat agi sereta enda kelalu mayuh muai jam bala orang ke sakit. Kemaya hari tu, pakar ngubat orang ngubat udah ngaga chara berubat ngena laser ti mit agi risiko penanggul iya.

5.    Lebas jaku adat/ukum

            Lebas jaku adat tauka ukum kaya enggau istilah enggau leka jaku ti khusus. Istilah tauka leka jaku diberi lebas jaku ke spesifik agi ngambika iya ulih diperatika bala mayuh. Lebas jaku tu lebih agi ngemeranka pengawa baka akta enggau adat tauka ukum ke bisi ba menua kitai.

            Lebas jaku tu mega dikena nerangka pekara ke bisi dalam adat tauka ukum enggau akta ke bisi dalam menua kitai. Ambika chunto, istilah enggau leka jaku ke bisi dalam lebas jaku adat tauka ukum tu dalam Akta Makhamah Juvana, 1947 (akta 90);

            Dalam akta tu bisi ngena leka jaku ‘asrama akhlak’ ti bereti siti-siti asrama ti dikemendarka perintah alai bala orang ke ngereja penyalah juvana tu diau sereta diberi penyedar ngambika enda ngereja penyalah nya agi.

            Kelimpah ari nya leka jaku ‘juvana’ tu salah siti ari lebas jaku adat tauka ukum ti bereti nya orang ke baruh umur lapan belas taun ti ngereja penyalah besai ke besangkut paut enggau adat tauka ukum menua deka didakwa baruh seksyen 82 kanun keseksaaan.

            Kelimpah ari ngena istilah enggau leka jaku khusus, lebas jaku adat tauka ukum bisi ngena gaya klausa enggau ayat dalam lebas ke ditulis dalam tukuh ayat penyata, iya nya ayat ti nerangka sesebengkah fasal nya enggau terang enggaika bisi penyaru. Tiap konstituen klausa dalam sesebengkah fasal nya mesti ulih diperatika semua genteran fasal nya. nyadi lebas jaku adat tauka ukum sigi pedis mimit deka diperatika kitai ke ukai orang dalam pengawa adat tauka ukum tu.

             Nyadi dalam lebas jaku adat tauka ukum tu kitai ulih meda lebas jaku ke dikena sida mayuh ngundan leka jaku ke dikena nerangka isi ke bisi dalam pelembagaan menua kitai. Lebas jaku adat tauka ukum tu suah  dipeda kitai dikena bala lawyer tauka bala hakim lebuh sida ngatur chara sesebengkah kes ke bisi nyadi ba menua kitai. Ba dalam court nya sida deka nerangka adat tauka ukum ke besangkut paut enggau penyalah ti dikereja orang ke dichara iya nya.

6.    Lebas Jaku Sukan

            Lebas jaku sukan tu mudah agi diperatika kitai enti disbanding enggau lebas jaku adat tauka ukum laban lebas jaku tu enda mayuh ngena istilah tauka leka jaku khusus enggau spesifik. Lebas jaku sukan tu betukuh pia aja enggau gaya jaku ti dikena ulih diperatika sereta dimeretika orang mayuh baka bala nembiak sekula enti dibanding enggau lebas jaku adat tauka ukum.

            Istilah enggau leka jaku ke dikena dalam lebas jaku sukan tu enda entu betukuh teknikal baka lebas jaku adat tauka ukum. Tukuh lebas jaku sukan ulih agi diperatika laban iya mayuh agi ngena leka jaku ke rama suah agi didinga kitai. Ambika chunto, baka leka jaku ‘gol’,’sipak’,’pengadil’ enggau ti bukai. Leka jaku ke bansa tu sigi suah didinga kitai kelebih agi dala sukan main bol enggau sukan ke bukai.

            Ari sukut ngena ayat mega, mayuh agi dalam lebas jaku tu ngembuan ayat penyata enggau ayat tunggal. Ayat-ayat ke baka tu bisi ngembuan tusun subjek enggau predikat. Bisi mega lebas jaku tu ngena ayat majmuk ngambika ulih nerangka sesebengkah utai ke benung nyadi enggau terang sereta silik kelebih agi dalam pengawa sukan ke benung nyadi.

            Kelimpah ari nya, guna lebas jaku sukan tu iya nya dikena orang ngenataika pengawa sukan ke benung nyadi. Ambika chunto, sukan main bol ke benung nyadi, dia sida deka madahka kitai nama utai ke benung nyadi ba sukan nya maya nya. baka sida deka madahka tim nya bulih gol enggau ti bukai. Lebas jaku sukan tu mega ulih ngenataika penemu senentang sukan ke benung nyadi nya. Ari nya sida ulih narit ati bala mayuh ngambika rindu sereta deka meda suka nya. Peninga mega enda berasai jampat leju enti orang ke ngenataika berita sukan nya ngena lebas jaku sukan ke betul sereta engkeman. Lebas jaku sukan tu mega bisi ngembuan intonasyen iya kediri empu laban intonasyen ke betul nya ulih mantaika pengaga ati orang nya enggau pengesal ati sida lebuh bemain ba sukan nya.

7.    Lebas Jaku Ekonomi

             Lebas jaku ekonomi deka sama enggau lebas jaku sains, lebas jaku tu lebih agi betukuh ilmiah enggau formal sereta ngemeranka penerang enggau fakta. Lebas jaku tu mega mayuh ngundan istilah khusus enggau rambai jaku ti betul enggau teknikal baka ‘kos’, ‘kos lepas’, ‘output’, ‘input’ enggau ke bukai. Taja pia, lebas jaku ekonomi, semina dibacha rama tauka sida ke ukai ahli ekonomi lebih agi ngena leka jaku ke mudah diperatika orang mayuh.

            Penteba ngena ayat dalam lebas jaku ekonomi mega bekabih enggau lebas jaku sukan, iya mayuh ngena bansa ayat penyata, baka ayat tunggal enggau ayat majmuk. Ayat-ayat tu mega betukuh deskriptif ngambika ulih nerangka aspek ekonomi tisuah disebut baka pengawa mata duit, saham, dagang enggau ti bukai.

            Kelimpah ari nya, lebas jaku ekonomi tu enda ngemeranka struktur ayat, laban lebas jaku tu semina ngena ayat ke muntang sereta nyamai diperatika bala mayuh, iya sigi bekabih enggau lebas jaku sukan.

             Tambahka nya mega, lebas jaku ekonomi tu ngemeranka tusun infomasyen ti dikenataika enggau terang. Dalam lebas jaku tu informasyen ke deka dikenataika semina senetang pengawa dalam ekonomi aja baka mata duit, input enggau ti bukai sereta informasyen ke senentang pengawa nya mesti dikenataika enggau terang ngambika nadai penyaru ngagai orang ti tau ngujungka pengerugi ngagai pengawa tu empu.

             Dalam lebas jaku ekonomi tu, tiap informasyen ulih dipejuraika bepelasarka utai ti amat ngena chara statik. Ambika chunto, nyamoau dagang menua niki ngagai tikas ti pemadu tinggi sepenyampau Rm 880.37 billion ba taun 2003, diparit sector ekonomi ngerikodka penyampau ti pemadu besai dalam sejarah ekonomi menua tu. Infomasyen nya madahka penyampau dagang menua niki ngena chara statik laban iya bepelasarka taun.

8.    Lebas Jaku Matematik

            Lebas jaku matematik tu lebih agi dikena dalam bidang matematik iya ke bekait enggau pengawa nesa enggau algebra. Lebas jaku tu bebida ari lebas jaku bahasa ti bukai, iya nya ari sukut chara ngena ayat ke betukuh deskriptif enggau penerang ti panjai ti ukai pemadu beguna dalam lebas jaku tu.

            Lebas jaku tu bisi ngembuan formula iya kediri empu enggau chara sereta jalai dikena ngaga saut matematik ti bisi ditanya. Nyadi, saut matematik tu semina ulih digaga ngena chara iya empu aja lalu enda sama enggau chara ke bukai.

            Dalam lebas  jaku matematik tu, bisi ngembuan lumur enggau simbul matematik baka tanda tambah (+), tolak (-), darab (x), bahagi (÷) enggau tanda sama enggau (=). Tanda tu suah dipeda kitai dalam matematik, nyadi tanda ke baka tu nyadi chunto lebas jaku matematik. Tiap simbul tu endang ngembuan reti iya kediri lalu kitai deka nemu nama utai ke diasuh gaga lebuh kitai meda simbul tub a tanya matematik.

9.    Lebas Jaku Pengarap

            Lebas jaku pengarap bisi ngembuan penteba iya kediri empu ti mida ke iya ari lebas jaku ke bukai. Lebas jaku pengarap iya nya nunjukka pengarap ke dipegai siku-siku mensia. Tiap pengarap nya ngembuan lebas jaku iya kediri empu dikena kitai muji petara sereta sembiang ngagai petara.

            Lebas jaku ke suah dikena dalam pengawa tu baka leka jaku ‘Allah’, ‘hari kiamat’ enggau ti bukai. Lebas jaku tu bisi dikena semua pengarap ba menua tu enda ngira pengarap Islam, kristian, Hindu enggau Buddha. Lebas jaku tu mega meri reti besai ngagai semua pengarap laban lebas jaku pengarap tu lebih agi meri puji ngagai petara ti meri jalai pengidup ngagai kitai mensia.

            Kelimpah ari nya lebas jaku pengarap tu bisi ngena leka jaku ari Bahasa Arab ke deka bekabih enggau jaku Melayu. Baka leka jaku ‘wajib’, ‘nikah’, ‘sah’ enggau ti bukai. Lebas jaku pengarap enda betukuh teknikal baka lebas jaku sains enggau lebas jaku adat tauka ukum, tang lebas jaku pengarap tu semina ngena leka jaku rama enggau istilah ke bisi dalam al-Quran, Bible enggau ti bukai. Lebas jaku tu mega, ngemeranka penerang ti betul enggau reti ti terang ngambika enda meri penyaru enggau disalah reti bala pemacha.

10.  Lebas Jaku Akademik/ Intelektual

            Lebas jaku akademik betukuh ilmiah, formal enggau bisi objektif kediri empu. Gaya jaku mantaika intelektual siku-siku orang nya tinggi sereta iya udah nemu berunding kediri empu senentang siti-siti pekara. Ambika chunto, lebas jaku akademik tu dikena kitai lebuh kitai belajarka sesebengkah pekara baka ngaga karang tauka pekara ke bukai ke bisi besangkut paut enggau ilmiah.

            Kelimpah ari nya, istilah ke dikena dalam lebas jaku akademik tu betukuh khusus enggau pedis ka diperatika orang ke nadai pelajar tinggi. Lebas jaku akademik tu deka deperatika lebih agi lebuh ngaga kereja kus. Laban lebuh kitai ngaga kereja kus tu, dia dih kitai deka ngena lebas jaku akademik nerangka sesebengkah topik nya, tiap pekara ke dipejuraika kitai nya mesti berurun nitihka format iya empu.

            Dalam lebas jaku akademik tu, bisi ngembuan ayat pasif enggau ayat majmuk laban penerang ke ditulis kitai nya mesti engkeman enggau saut ke diberi. Kitai enda ulih nulis meri penerang nya ngena ayat ke tergantung. Ba lebas tu mega, format iya empu baka bibliografi, nota kaki enggau indeks. Semua tu suah dipeda kitai lebuh kitai ngaga kereja kus.

11.  Lebas Jaku Litaricha

            Lebas jaku litaricha dibagi ngagai dua iya nya lebas jaku kreatif enggau lebas jaku ilmiah. Lebas jaku kreatif tukuh ti bepun ari imaginasyen enggau peneleba siku-siku orang. Ambika chunto, lebas jaku kreatif tu nitihka pengering imaginasyen siku-siku mensia. Enti peneleba enggau imaginasyen iya tinggi, iya deka ulih nulis enggau kreatif agi.

            Peneleba ti dikena ngenataika mesej enggau asai ati diri ngagai orang ke macha. Ambika chunto, asai ati nya ulih dikenataika nengah chara nulis, baka nulis jerpan pandak, novel, pantun enggau drama. Ari nya, lebas jaku ke dikena nya nitihka pengelandik diri empu enti imaginasyen iya tinggi iya ulih narit ati pemacha ngambika rindu macha karya ke ditulis iya.

            Tukuh lebas jaku litaricha tu iya nya pengaya leka jaku. leka jaku ke dikena muntang diperatika, nadai ngena leka jaku teknikal. Jaku injau mega nadai dikena ba dalam lebas jaku tu. Lebas jaku tu mega ngena jaku turu dikena meri penerang dalam ayat, kebuah piua laban tiap ayat nya mesti dipadah enggau terang ngambika pemacha nyamai agi meretika utai ke dikenataika kitai.

            Tukuh senentang jalai jaku iya nya morfologi enggau sintaksis endang dikemeratka dalam lebas jaku litaricha tu. Aspek morfologi tu nyengkaum penambah leka jaku. ambika chunto, penambah leka jaku ba karya litaricha nyengkaum penambah pun, penambah kepit enggau penambah selit. Chunto leka jaku ke suah dikena orang dalam lebas jaku litaricha tu baka jaku silup baka ‘enda alah kempuk tanah seberai enda alah tunduk orang ke enggai’.

12. Lebas Jaku Berita

Tukuh lebas jaku berita ulih diperatika belalauka sekeda pekara tu. Kesatu, lebas jaku berita ngembuan topik ke nyengala belalauka frasa topik tauka ayat topik. Teks berita mega ngembuan siti idea dalam siti ayat lalu iya suah ngelengkaka jaku penyambung, jaku tesa, & penambah. Kelimpah ari nya berita mai penerang randau (lisan) ari siku ngagai siku. Uji peratika chunto ba genteran ke nangkanka tu.

Chunto:

Sri Aman- Hari Empat ,22 Spt. Tiga puluh bakal lebuh bas ti ngundan nembiak sekula belantak enggau lori tangki di Jalai Sabu.

Sri Aman- kena Hari Empat,22 Spt.Tiga puluh iku orang bakal lebuh sebuah bas ti ngundan nembiak sekula belantak enggau sebuah lori tangki di Jalai Sabu.

Lebas jaku dalam berita tauka surat kabar ngundan tanda casual,cumulative and situated structure of conversation. Kelimpah ari nya leka jaku ke dikena nya jaku randau besehari-sehari.