Pengantar Sosiolinguistik - Pengalus Jaku
Pengalus jaku tu besangkut enggau
chara ngena leka jaku enggau sada ti alus sereta besebar. Taja pan pengawa
pengalus jaku tu enda sama ba siti-siti komuniti, pengalus jaku tu meruan megai
fungsyen ke besai dalam ngenanka pengelikun menua. Kebuah pia laban pengawa
pengalus jaku tu ulih dikena mandangka adat basa enggau ulah ti beradat
siku-siku mensia.
Keterubah iya, pengalus jaku tu ulih
nyerakupka mensia ti mayuh macham bansa di menua tu. Kebuah baka nya laban siti
ari tuju pengawa pengalus jaku tu iya nya awakka semua orang ti bekabih enggau
pengawa nya berasai lantang enggau diri sama diri. Chunto iya, lebuh kitai
betemu enggau pangan diri, kitai betabi jari kena kitai nunjukka basa ngagai
pangan diri. Lebuh kitai bejalai mansa ba mua orang, kitai ngeruntukka mimit
tubuh kitai nyadika tanda kitai bebasaka orang nya. Ari nya, pengelikun ulih
ditanka enti kitai bebasaka pangan diri.
Nambah ke nya mega pengawa pengalus
jaku tu ulih muka runding mensia mayuh awakka sida ulih nerima pekara ti
dikedaka orang bukai lalu mekuhka kaul ti manah. Chunto iya, daya idup kitai
Iban lebuh bisi temuai datai lalu dilaluka kitai, diberi kitai ngirup, enti
orang nya datai tengah hari diberi kitai makai lalu enti temuai nya datai lemai
ditanka kitai bemalam. Ari nya kitai ulih ngenanka kaul ti manah enggau temuai.
Enti mensia ti mayuh macham bansa nya ulih begulai enggau manah sereta
beserakup, ulih mih pengelikun menua kitai tu ditanka.
Kelimpah ari nya, pengalus jaku tu
mega ulih ngenanka pengelikun menua enti mensia ti mayuh macham bansa ba menua
tu sama bela bekenaka pengalus jaku lebuh bekomunikasyen enggau pangan diri.
Kebuah baka nya laban lebuh kitai bejaku, kitai ukai semina bebasaka orang ti
enggau kitau berandau tang mega orang bukai ti ninga ti bisi semak dia. Chunto
iya, lebuh kitai bejaku, nyawa kitai anang kelalu ragak enggaika ngachau orang
bukai. tuju iya, kitai ka ngenyamaika ati orang ti ninga kitai bejaku.
Siti agi chunto daya idup Iban ti mandangka
pengalus jaku enggau basa iya nya beduruk lebuh ngereja pengawa. Orang Iban
kelebih agi sida ti diau di rumah panjai endang sigi suah beduruk lebuh ngereja
pengawa baka pengawa bumai, nebas, ngaga rumah enggau gawa kebun. Ngereja pengawa
beduruk ulih ngenanka pengelikun sesebengkah komuniti nya laban pengawa nya
ngempung sida iya besaup sereta betulung ngereja pengawa. Enti semua komuniti
ngereja pengawa enggau chara nya, nadai patut pengelikun enda ulih ditanka.
No comments:
Post a Comment