MORFOLOGI - nempa jaku

1.0  Proses Nempa Jaku

            Nempa leka jaku baru dalam jaku Iban endang bisi mayuh macham chara tang ruat agi ngena chara ngelekatka penambah ngagai urat jaku. Leka jaku bisi nya betukuh tunggal lalu bisi leka jaku ti ditempa ari proses meri penambah, beturuka leka jaku enggau betanduka leka jaku. Munyi ti disebut, jaku Iban nya siti ari bansa jaku dalam raban jaku aglutinatif tauka jaku ti betukuh derivatif. Jaku ti bansa tu ulih nempa leka jaku ketebal agi ari proses  ngelekatka penambah tauka besakumka morfem urat jaku enggau morfem penambah ngena chara bedijirka leka jaku dalam siti baris. Reti nya, penambah disakum enggau urat jaku. Proses nempa leka jaku ti betukuh derivatif tu ulih ngasilka mayuh amat leka jaku ari proses besakum tauka besambungka leka jaku enggau mayuh macham penambah ti bisi. Dalam jaku Iban, siti urat jaku ulih dikerembaika ngagai leka jaku baru. Langkah rapat dikena ngerembaika leka jaku dalam jaku Iban endang besibil enggau jaku bukai kelebih agi jaku ti betukuh infleksyen baka jaku English enggau jaku Arab sereta mayuh jaku ti bukai.

            Kelimpah ari nya, leka jaku ulih mega ditempa ari ti betanduka urat leka jaku enggau penuh, betanduka sebagi ari patah sebut urat jaku sereta betanduka patah sebut dudi. Siti agi chara nempa leka jaku nya ari ti beturuka leka jaku, iya nya besambungka dua leka jaku tauka lebih nyadi siti leka jaku baru. Nambahka nya, rapat salin ari jaku injau tau mega dikena. Ngena chara ngedutka leka jaku lalu ngasilka jaku tunggal akronim tau mega dikena.

            Keterubah tu aku deka nerangka bakani proses jaku nama ditempa. Jaku nama bisi empat bengkah tukuh iya nya jaku nama tunggal, jaku nama tumbuh, jaku nama turu enggau jaku nama betandu. Jaku nama tunggal nya datai ari siti morfem aja lalu iya udah ulih nyadi siti leka jaku ti meruan. Jaku akronim nya siti ari jaku nama tunggal. Jaku nama akronim nya leka jaku ti ditempa ari ke besakumka bagi-bagi ti dilesit ari dijir leka jaku. Bagi-bagi nya baka urup, patah sebut, tauka bagi-bagi ari leka jaku. Jaku nama tumbuh ditempa nengah proses meri penambah, iya nya proses besakumka penambah jaku nama ngagai urat jaku nama. Bisi dua bengkah jaku penambah ti ulih besakum enggau lima bengkah urat jaku dikena nempa jaku nama tumbuh. Dua bengkah penambah nya iya nya penambah mua enggau penambah selit.

            Penambah mua jaku nama nya bisi tiga iti iya nya, peN-, pe-, enggau juru. Tukuh penambah mua peN- datai dalam empat bengkah penambah, iya nya pe-, pem-, pen-, enggau peng-. Sibil antara tukuh penambah nya bepanggai ba dua faktor. Faktor ti keterubah iya nya faktor fonologi, iya nya bansa urup keterubah ba urat jaku ti deka besakum enggau siti-siti penambah nya. Faktor ti kedua iya nya faktor pengerembai enggau pemansang jaku, ngasilka tukuh ti enda besenutuk enggau peneleba tauka pengerentang fonologi jaku Iban. Aspek reti penambah peN- endang sebaka enggau semua penambah bukai, iya nya tukuh ti ditawingka enggau urat jaku kena nempa jaku tumbuh lalu bisi reti baru ti ditanggam leka jaku nya. Penambah endang nadai mai reti ti menyana tang lebuh ditawingka tauka disakumka enggau urat jaku dia leka jaku ti bepenambah nya bisi ngundan reti ti meruan. Ari nya, penambah tau dikumbai penanda reti ngagai jaku tumbuh. Penambah mua pe- nya penambah ti ditawingka enggau urat jaku lalu nadai ngubah munyi ba pun urat jaku nya. Penambah mua pe- tu bisi dua penanda reti. Keterubah nya, penambah mua pe- penanda reti orang tauka nama utai ti bisi nerima ubah urat jaku tauka gaya. Chunto iya, pesakit mai reti orang ti sakit nya. Kedua, penambah mua pe- nyadi penanda reti orang ti ngereja pengawa nitihka reti ba urat jaku. Chunto iya, pengajar mai reti orang ti ngajar. Penambah mua ti ketiga iya nya penambah mua juru. Dalam jaku Iban endang bisi ngena leka jaku juru- nyadika penambah mua jaku nama , iya nya nginjau ari jaku bukai. Ari aspek reti juru- nanggam penanda reti orang ti endang udah landik ba sesebengkah bidang pengawa. Penambah juru tau besakum enggau urat leka jaku ari raban jaku nama. Chunto iya, juru + bahasa nyadi jurubahasa.

            Nangkan ke nya, jaku nama ulih ditempa nengah chara meri penambah selit. Bisi tiga tukuh penambah selit jaku nama iya nya –le-, -ga-, enggau –er-. Sibil antara tiga tukuh penambah nya ditentuka ari faktor morfologi ukai ari fonologi, iya nya sibil tukuh ti besakum enggau urat jaku ti bebida. Tukuh jaku selit tu enda produtif lalu tau dianggap siti tukuh ti meku tauka kurang potensi ngerembai. Chunto, kemayang diselitka penambah –le- nyadi kelemayang. Jaku nama turu nyadi ari proses bedijirka dua urat jaku tauka lebih ti mai reti ke meruan sereta entap. Jaku nama turu disepil beserara tang betandan nyadi siti unit. Jaku nama turu ulih nerima penambah dikena nempa jaku tumbuh. Jaku nama turu ti nerima penambah mua disepil beserara. Chunto iya, terima kasih nyadi beterima kasih.

            Kelimpah ari nya, jaku nama tau ditempa ngena proses betandu kena ngangkatka mayuh macham reti. Semua jaku nama, iya nya jaku nama tunggal, jaku nama tumbuh, enggau jaku nama turu tau dipetanduka. Bisi dua bengkah jaku betandu ti ditempa ari urat leka jaku iya nya betandu penuh enggau betandu sebagi. Keterubah, jaku betandu penuh enggau urat jaku nama sereta nadai berubah tukuh. Jaku nama ti dipetanduka tau datai dalam bemacham-macham tukuh. Urat jaku ti dipetanduka tau datai ari jaku tunggal, jaku nama tumbuh enggau jaku nama turu. Chunto jaku nama tunggal ti betandu penuh iya nya, bup-bup. Nangkan ke nya betandu jaku nama tumbuh. Betandu jaku nama tumbuh tu bisi dua bagi. Keterubah nya jaku turu ti disepil beserara, lalu semina bagi ba pun jaku aja ti dipetanduka. Kedua, jaku turu ti disepil begulai ketegal ari pengentap iya udah dikena meruan disepil bejarit penuh. Chunto iya, pola jaku ditandu nyadi pola-pola jaku. Iya ti kedua iya nya betanduka sebagi ari jaku nama. Betanduka sebagi ari jaku nama nya proses betandu ba patah sebut keterubah leka jaku ti dipetanduka nya berubah nyadi vokal tengah iya nya e pepet. Chunto iya, leka jaku laki ditandu patah sebut keterubah iya nyadi la-laki tang munyi vokal dalam patah sebut keterubah nya lalu berubah nyadi vokal tengah iya e pepet, lelaki. Proses ti kepenudi dikena nempa jaku nama iya nya bekaling sebut jaku nama. Bekaling sebut jaku nama nya proses ti bekalingka urat jaku nama sechara penuh nitihka entak munyi vokal tauka konsonan. Proses tu tau diperatika ari munyi ti diulang tauka diubah ba leka jaku ti dipetanduka. Bekaling sebut jaku nama endang bisi ngembuan variasyen kaling ti meruan, tetap sereta entap. Chunto iya, periuk genuk, bilik penaik enggau tedung remaung. Bisi tiga aspek reti ti dibungkur bekaling sebut jaku nama tu iya nya bekaling kena nanda kaul mayuh bengkah  bansa utai, bekaling kena nanda raban kereban enggau bekaling kena nanda kaul utai idup mensia tauka utai idup ukai mensia.

            Diatu aku deka bejuraika bakani jaku pengawa ditempa. Jaku pengawa dalam jaku Iban bisi empat bengkah tukuh iya nya, jaku pengawa tunggal, jaku pengawa tumbuh, jaku pengawa turu enggau jaku pengawa betandu. Jaku pengawa tunggal nya jaku ti bediri enggau nadai bepenambah. Chunto jaku pengawa tunggal iya nya, pulai, terebai enggau makai. Jaku pengawa tumbuh nya jaku pengawa ti nyadi asil ari proses meri penambah, iya nya proses ti betawing tauka besakumka penambah ngagai urat jaku dikena nempa jaku pengawa tumbuh. Dalam jaku Iban, jaku pengawa tumbuh tau ditempa ari proses besakum tauka betawingka penambah mua, penambah kepit, enggau penambah belakang.

            Penambah mua ti nempa jaku pengawa dalam jaku Iban nya baka penganti pun m-, n-, penambah ng-, penambah ny-, penambah be-, penambah di-, penambah te-, enggau mayuh agi ke bukai. Tiap-tiap iti penambah mua nya tau ngasuh reti asal urat jaku nya berubah. Iya mai ubah reti ti enda sebaka. Ambika chunto, urat jaku iya gali ditambah enggau penambah mua te- iya nyadi tegali. Enti iya semina gali, orang nya ngalika diri enggau sengaja enggau tuju deka belelak tauka tinduk tang enti iya tegali, pengawa gali nya tadi nyadi sechara progresif sereta nyemetak. Chunto dalam ayat, “Nangan telinchir lalu tegali ba jalai ti luchak nya”. Reti nya Nangan ukai sengaja gali ba jalai ti luchak nya. Fungsyen penambah te- ba ayat tu mai reti enda sengaja.

            Penambah belakang jaku pengawa semina bisi siti aja iya nya penambah –ka. Semua batang raban jaku sekalika nya jaku nama, jaku pengawa, jaku adjektif, jaku penempat enggau sekeda jaku tugas tau besakum enggau jaku penambah belakang –ka kena nempa jaku pengawa. Chunto iya, idupka, kirumka, terebaika, besaika, semakka enggau mayuhka. Penambah belakang –ka tu tau dikena nempa jaku pengawa transitif. Jaku pengawa ti nerima penambah belakang –ka datai dalam dua bansa ayat, iya nya ayat pasif kena nganti jaku ganti nama orang kesatu enggau orang kedua sereta dalam ayat perintah mega. Aspek reti penambah belakang –ka nya siti penambah ti dikena nempa jaku pengawa transitif. Bisi dua bengkah reti ti nyemetak tau dikaitka enggau leka jaku ti bepenambah belakang –ka, iya nya meri reti kausatif tauka ngasuh nyadi. Chunto iya, panjai nyadi panjaika (ngasuh nyadi panjai). Ti kedua iya nya meri reti benefaktif tauka ngereja sesebengkah pengawa pulaika penguntung orang bukai. Chunto iya, leka jaku beli nyadi belika (melika orang bukai). Penambah kepit mega ulih dikena nempa jaku pengawa. Penambah kepit nya leman penambah ti datai ngepit urat jaku, iya nya sebagi penambah datai ari mua urat jaku lalu sebagi agi datai ari belakang urat jaku; reti nya penambah kepit datai sereta lebuh besakum enggau urat jaku.

            Udah nerangka bakani jaku pengawa tunggal enggau jaku pengawa tumbuh ditempa, diatu aku deka bejuraika proses nempa jaku pengawa turu. Jaku pengawa turu datai ari dijir dua morfem meras tauka lebih. Dalam jaku Iban, tebal agi jaku pengawa turu datai ari jaku nama. Chunto jaku turu ti nyadi raban jaku ti dikumbai jaku pengawa iya nya tunggang lupung, ambi ulih enggau peluh tusur. Dalam jaku Iban, jaku turu ari raban jaku nama tau digaga nyadi jaku pengawa ari proses jaku tumbuh. Lebuh jaku turu nerima penambah mua, urat jaku mengkang disepil beserara. Tang lebuh nerima penambah kepit, urat jaku disepil besambung. Chunto iya jaku pengawa turu terima kasih nyadi beterima kasih. Nangkan ke nya, jaku pengawa tau ditempa ngena proses betandu, iya nya proses ti betanduka urat jaku lalu nadai ngerampit sebarang penambah. Dalam proses tu urat jaku deka betandu penuh tauka betandu sebagi. Urat jaku mega tau dipetanduka sereta, iya nya nitihka munyi dalam urat jaku. Di  baruh tu deka dipejuraika jaku pengawa dalam jaku Iban, iya nya nitihka tiga bansa jalai betandu; betandu penuh, betandu sebagi enggau betandu nitih rentak. Betandu penuh nya proses betandu penuh urat jaku. Chunto, michit nyadi michit-michit. Betandu sebagi nya proses ti betanduka sebagi urat jaku. Raban jaku pengawa betandu sebagi nyadi ba urat jaku ti bepenambah, lalu sebagi agi ba urat jaku ti dipetanduka, iya nya bagi ti bepenambah. Tukuh-tukuh tandu nya tau diengkah ari mua tauka ari belakang urat jaku. Chunto iya, begiga-giga (betandu sebagi di mua urat jaku) enggau nyebut-senyebut (betandu sebagi di belakang urat jaku). Betandu nitihka rentak nya proses betanduka urat jaku nitihka rentak munyi dalam urat jaku. Lebuh betandu nitihka rentak munyi dalam urat jaku. Lebuh betandu nitihka rentak, urat jaku bisi nya dipetanduka penuh nitihka munyi ti sama tauka munyi ti bisi betuja, iya nya sekalika nitihka munyi vokal tauka munyi konsonan ti ditentuka aja. Bisi mega proses betandu ti nadai nitihka munyi vokal tauka konsonan. Chunto jaku pengawa ti betandu nitihka rentak munyi konsonan ti sama iya nya bitau-bitau, kalik-kalik, kin-kitu enggau kundang-kasang. Chunto jaku pengawa ti betandu nitihka rentak munyi vokal ti sama iya nya sarak-tebererak, penapat-inat, enggau begiling-kaping. Chunto jaku pengawa ti betandu nitihka rentak meras iya nya pulai-mansang, miskin-papa, rebah rimpai enggau telentang tungkup. Ari aspek reti, leka jaku ti ditempa ngena proses betandu bisi manggum reti ti menuku baka nunjukka pengawa ti beulang-ulang, nunjukka pengawa ti agi meruan tauka terus-menerus, nunjukka pengawa ti senaka ulih dikereja sereta nunjukka pengawa ti betimbal tauka bebalas-balas.

            Jaku adjektif mega ulih dikelala tauka dibida ari jaku nama tauka jaku pengawa ari ti beratika chara iya ditempa. Jaku adjektif tau dalam empat iti tukuh iya nya jaku adjektif tunggal, jaku adjektif tumbuh, jaku adjektif betandu enggau jaku adjektif turu. Jaku adjektif tunggal tu nadai nerima penambah tauka proses betandu leka jaku. Jaku adjektif tumbuh datai ari urat jaku adjektif ti nerima penambah iya nya penambah mua enggau penambah kepit. Penambah mua ti nempa jaku adjektif nya nge-, be-, enggau beke-, ti besakum enggau urat jaku adjektif. Penambah kepit ti nempa jaku adjektif tumbuh nya ng-...-ka ti mai reti nunda. Chunto jaku adjektif ti ngena penambah kepit iya nya leka jaku iban nyadi ngibanka. Udah nya, jaku adjektif betandu ulih ditempa ngena lima bengkah chara, iya nya betandu penuh, betandu patah sebut dulu, betandu urat jaku, betandu patah sebut dudi, enggau betandu serentak. Betandu penuh nya chara nempa jaku adjektif ti pemadu  mudah, iya nya betanduka jaku adjektif tunggal kena meri reti tukuh ti selampur. Chunto iya chegit-chegit, melan-melan, dugau-dugau enggau mayuh agi ti bukai. Kedua, betandu patah sebut dulu nya chara nempa jaku adjektif ti nekanka patah sebut dulu urat jaku adjektif ti dipetanduka kena meri reti ti mantang ngagai urat leka jaku. Chunto iya dedugau; “Sida menyadi dedugau nganti apai enggau indai pulai gawa”.

            Nangkan ke nya, jaku adjektif betandu urat leka jaku. Betandu urat jaku nya siti agi chara kena nempa jaku adjektif ti nekanka urat jaku ti dipetanduka dikena meri reti ti mantang ngagai urat jaku. Chunto iya, bebelit-belit, manah-semanah, rindu-serindu enggau mayuh agi ti bukai. Chunto ayat ti ngena jaku adjektif betandu urat jaku iya nya baka tu, “Jalai ari Sibu ngagai Mukah bebelit-belit”. Udah nya, jaku adjektif betandu patah sebut dudi. Betandu patah sebut dudi nya siti mega chara kena nempa jaku adjektif ti nekanka urat jaku ti dipetanduka dikena meri reti ti mantang ngagai urat leka jaku. Chunto iya, pemerani-rani, pengeran-ngeran enggau pengaga-ngaga. Chunto dalam ayat iya nya, “Igat balat pengeran-ngeran deka ngambi Endu Cheria ke bini”. Iya ti kepenudi iya nya jaku adjektif berentak. Jaku adjektif berentak nya jaku adjektif ti ditempa ngena chara betanduka urat jaku adjektif enggau kaling iya kena ngaga pemanah munyi jaku. Iya dikena kelebih agi dalam leka main asal Iban. Chunto jaku adjektif berentak iya nya chelap embap, tabar lar, chelum ngelintum enggau mayuh agi ti bukai. Chunto dalam ayat iya nya, “Lauk ti dipanduk Umang tabar lar”.

            Nangkan ke jaku adjektif betandu iya nya jaku adjektif turu. Jaku adjektif turu nya jaku ti datai asil ari proses bedijirka dua urat jaku tauka lebih ti mai reti ke menyana. Jaku adjektif turu disepil beserara tang bekereja nyadi siti unit. Chunto jaku adjektif turu iya nya gadung daun, kuning entemut enggau mirah engkerebai. Chunto dalam ayat iya nya, “Pengajar Silla ngena baju bechura gadung daun”. Bisi mega dijir leka jaku ti mai reti besilup, ti datai ari jaku sempama. Chunto iya, jai jari, betubuh bisi, buruk siku enggau manuk sabung. Chunto ayat iya  baka tu, “Endu udah betubuh bisi”.

            Jaku tugas nya leka jaku ti datai dalam ayat, klausa tauka frasa kena nanggam sesebengkah tugas sintaksis sekalika nyadi jaku penyambung, penerang, penentu, penguat, jaku pun ayat, enggau tugas-tugas bukai. Jaku tugas tu mayuh amat. Chunto iya, jaku tekenyit, jaku tanya, jaku perintah, jaku pun ayat, jaku bantu, jaku penguat enggau mayuh agi ti bukai ti enda ulih dirintaika ditu magang. Raban jaku tugas ulih ngagai empat iya nya jaku penyambung ayat, jaku praklausa, jaku prafrasa enggau jaku pascajaku. Jaku penyambung ayat dibagi ngagai dua bengkah iya nya jaku penyambung tunggal enggau jaku penyambung berentayan. Jaku tugas tu suah agi ditemu kitai dalam ayat betukuh tunggal. Jaku tugas tu jarang bekenaka penambah sereta nadai dikena betandu. Taja pia, bisi ga jaku tugas ti dilekatka penambah dikena ngubah reti tauka meri reti ngagai ayat. 

(...sebagi ari kerja kus morfologi...)